Un coche volcado, tres rapaces feridos de diversa gravidade e numerosos medios de emerxencia traballando baixo a chuvia por salvar as súas vidas. Esta, que pode ser a instantánea dunha fatídica noite de excesos, será o realista escenario sobre o que mañá terá lugar a rodaxe do videoclip central da campaña "Ti controlas. Ti decides". Nela, a Policía Local de Santiago de Compostela procura conseguir que a xuventude sexa consciente, nunha linguaxe próxima e impactante, dos perigos da condución asociada ao consumo de alcohol e outras sustancias.

O dispositivo desenvolverase no Polígono de Costa Vella en Santiago de Compostela na noite do mércores 22 ao xoves 23. Dotacións de Bombeiros, Policía Local, Protección Civil e 061 traballarán baixo a chuvia e os focos para amosar a efectividade e o dramatismo do seu complexo traballo diario. A Policía Local colabora tamén nesta campaña coa Facultade de Comunicación da Universidade de Santiago de Compostela. Os actores protagonistas e diversos membros do equipo proceden deste centro universitario, co que se inicia un proceso de traballo conxunto para mellorar a efectividade deste tipo de propostas de sensibilización dirixidas á xente nova.

Videoclip cinematográfico
As ausencias. Os lugares baleiros e as persoas que nunca chegan ao seu destino. As vidas rotas. Estes son os eixos do tema "12.35", da cantautora pontevedresa Noemia Gonçalvez, que con 19 anos vén de gañar o Certame de Música Galega da USC. Unha banda sonora delicada e emotiva que collerá forma baixo a dirección do realizador ourensán Simón Vázquez. Outros dous nomes destacan tamén no equipo de imaxe. Dunha banda, a directora de fotografía Lucía Catoira Pan, responsable dos filmes Dhogs ou Trote, entre outros, un dos talentos máis destacados da iluminación cinematográfica actual en Galicia. Doutra banda, a dirección de arte correrá a cargo do naronés Antonio Calvo, un dos estilistas máis prestixiosos de España, con catro premios Fígaro ás súas costas.

Campaña de sensibilización
O soporte audiovisual resultante formará parte dun proxecto de sensibilización e concienciación co obxectivo de que os condutores novos non combinen alcohol e volante. Este contido educativo e didáctico será empregado en charlas divulgativas de seguridade viaria dirixidas a alumnado de Bacharelato ao longo do 2018. Ademais, a rodaxe do simulacro permitirá avaliar a capacitación do persoal involucrado na emerxencia, así como poñer en valor a coordinación e atención prestada polos distintos servizos de emerxencia participantes. Trátase en definitiva, de proxectar unha imaxe operativa da situación ao tempo que se comunican os riscos dos malos hábitos ao volante.