O ano 2015 pechouse en Santiago de Compostela sen vítimas mortais en accidentes de tráfico no ámbito de competencias da Policía Local, un balance moi positivo que se produce por segundo ano consecutivo. A Policía Local relaciona esta boa evolución cunha maior concienciación da sociedade sobre os problemas do tráfico, e tamén cun incremento da vixilancia sobre as prácticas de risco dalgúns condutores. O balance foi o presentado en rolda de prensa polo inspector da Policía Local José Antonio Pena, a oficial Diana Parente e o concelleiro de Medio Ambiente e Convivencia, Xan Duro.

Despois de case medio ano funcionando con éxito no CEIP Pío XII, o programa Colecamiños chegou hoxe ao CEIP Raíña Fabiola. Fíxoo cunha única ruta, coincidente coa establecida dende Galeras para o Pío XII, e con oito nenos e nenas participantes, un número aceptable tendo en conta o mal tempo e o feito de estarmos á volta das vacacións de Semana Santa. Nas próxima semanas, a Policía Local continuará co traballo de difusión deste camiño escolar seguro, co obxectivo de que se sumen novos rapaces e rapazas.

A Policía Local, en colaboración coa Dirección Xeral de Tráfico, vén de realizar unha campaña especial de vixilancia sobre o uso do cinto de seguridade, con especial atención aos sistemas de retención infantil. Entre os días 14 e 20 de marzo, os axentes incrementaron os controis, para concienciar da importancia do uso do cinto, un elemento que reduce á metade o risco de morte en accidentes de tráfico. A xulgar polos resultados, os condutores teñen totalmente asumida a necesidade de empregar o cinto en todas as circunstancias.

Do 14 ao 20 de marzo, a Policía Local de Santiago realizará controis sobre o uso do cinto de seguridade e dos sistemas de retención infantil (SRI). Sumarase así a unha nova campaña da Dirección Xeral de Tráfico sobre dous elementos cuxo uso é obrigatorio e que contribúen a reducir sensiblemente a sinistralidade nos accidentes de tráfico.

A Policía Local de Compostela está actualizando os seus coñecementos, grazas a un plan formativo organizado polo Concello e que ten como obxectivo garantir a seguridade cidadá. A temática dos cursos está relacionada co labor diario dos axentes.