A Policía Local de Santiago continúa co seu programa Vivimos as mesmas realidades, que ten como obxectivo fomentar a educación viaria nos centros de educación especial. Esta mañá, os axentes achegáronse ao Colexio de Educación Especial A Barcia, no que estudan uns 60 rapaces de entre 3 e 21 anos e afectados por distintas patoloxías. Alí, amosáronlle aos nenos e mozos como é o seu traballo, e mesmo lles deixaron coñecer de cerca o material e os vehículos que utilizan.

A Policía Local segue recorrendo os colexios de Compostela, co seu programa de seguridade viaria Móvete seguro con Moito Olliño. No que vai de curso, foron xa máis de 500 alumnos de 4º e 6º de Primaria os que participaron nas actividades, que pretenden facilitarlles aos rapaces as claves para unha mobilidade segura. O programa estase desenvolvendo tanto nos colexios públicos como nos privados, e polo de agora chegou xa aos CEIP López Ferreiro, Raíña Fabiola e Quiroga Palacios, e aos colexios Manuel Peleteiro, San Pelayo-Emma e A Salle.

No marco do programa Vivimos as mesmas realidades, a Policía Local impartiu este martes unha charla educativa aos mozos e mozas da Fundación Down Compostela. O obxectivo destas sesións é que os alumnos e alumnas aprendan a circular con seguridade.

O concelleiro de Medio Ambiente e Convivencia, Xan Duro, e a inspectora da Policía Local Diana Parente, reuníronse este martes coa ANPA e a dirección do CEIP Pío XII para darlles todos os detalles do proxecto Colecamiños, que o Concello vai poñer en marcha inicialmente neste colexio.

A Policía Local de Santiago quere que os nenos e nenas vaian camiñando aos seus colexios, e poidan facelo de forma segura. Por iso, vén de poñer en marcha o proxecto Colecamiños, unha experiencia pioneira en Compostela que inclúe diversas actividades, e que se desenvolverá inicialmente no CEIP Pío XII.